FEMINAS di Vanna Flore

Semus sas fozas, 
Chi trimughinant su ‘entu.
Semus sa fiama,
De su fogu tentu.

Semus ispinas,
‘E sudore,
Semus de su partu,
Su dolore.

Semus su late,
De sa tita piena,
Semus s’amore,
Chi ligad’a cadena.

Semus su pane,
De cada die,
Semus su calore,
De una note ‘e nie.
Semus de su fizu,
Su diletu,
Semus de su maridu,
S’ afetu.

Semus sas rundines,
Chi torrana in beranu,
Semus s’amistade,
Ch’ istringhede sa manu.

Semus in cada impegnu,
De sa sociedade,
Semus abiles,
Su mundu a cambiare.

Semus in sa ‘ona,
E sa mala sorte,
Semus in sa vida,
E in sa morte.

Semus poesia,
‘E cantu,
Semus criaturas,
De incantu.